இழிவாக பேசினாரா கமல்ஹாசன்…? ஹெச். ராஜா கண்டனம்…!

சென்னை: கர்நாடக இசை பிரியர்கள் நடிகர் கமல்ஹாசனை புறக்கணிக்க வேண்டும் என்று பாஜக மூத்த தலைவர் ஹெச். ராஜா தெரிவித்துள்ளார்.

கடந்த வாரம் இன்ஸ்டாகிராம்’ பக்கத்தில் ‘தலைவன் இருக்கிறான்’ என்ற நிகழ்ச்சியில் கமல் ஹாசன், விஜய் சேதுபதி இருவரும் உரையாடினர். அப்போது விஜய் சேதுபதி கேள்விகளுக்கு கமல்ஹாசன் பதில் அளித்தார்.

‘நீங்கள் அரசியலுக்கு வர வேண்டும்’ என உங்களை இளையராஜா கேட்டுக் கொண்டார். ஆனால், அரசியலுக்கு வருவது பற்றி ஒரு வார்த்தை கூட நீங்கள் பேசவில்லையே ஏன் என்று விஜய் சேதுபதி கேள்வி எழுப்பினார்.

வறுமையின் நிறம் சிவப்பு படத்தில் இருந்தே சில தைரியமான கருத்துக்களை தெரிவித்து இருக்கிறேன். என்னுடைய சினிமா அனைத்தையும் உற்று கவனித்தால், ஏதாவது ஒன்று இருக்கும்.

சத்யா, தேவர்மகன், நம்மவர் ஆகிய படங்கள் இதற்கு உதாரணம். இவற்றில் ஏதாவது ஒன்று கூறி இருப்பேன். தமிழகத்துக்கு சாதி சண்டை என்றால் அதிகம் பிடிக்கும். ‘ஹே ராம்’ படத்தை இன்றைக்கு பார்க்கும் போதும் சில இடங்களில் இப்போதும் நாக்கை கடித்துக் கொள்வேன்” என்றார்.

அரசியலுக்கு வருவதை தள்ளிப்போட்டது ஏன்? என்ற கேள்விக்கு, ”அதற்கான சூழல் மற்றும் வயது வர வேண்டும் என்று இருந்து விட்டேன்” என்று பதில் அளித்து இருந்தார்.

இந் நிலையில் கமல்ஹாசனின் உரையாடல் குறித்து இன்று ட்விட்டரில் பாஜக தேசிய செயலாளர் ஹெச் ராஜா கண்டனம் தெரிவித்துள்ளார். இது குறித்து அவர் கூறி இருப்பதாவது:

சங்கீத மும்மூர்த்திகளில் முதன்மையானவர் தியாகய்யரை இழிவாகப் பேசியுள்ள கமல்ஹாசனின் அநாகரீகச் செயலை வன்மையாகக் கண்டிக்கிறேன். கர்நாடக இசை பிரியர்கள் இவரை அனைத்து விதங்களிலும் புறக்கணிக்க வேண்டும் என்று தெரிவித்துள்ளார்.