தலைமை நீதிபதி என்.வி ரமணா கவலை

நாடு முழுவதும் உள்ள ஐகோர்ட்டுகளின் தலைமை நீதிபதிகள் மற்றும் மாநில முதல்-மந்திரிகளின் ஒருங்கிணைந்த மாநாட்டை டெல்லியில் உள்ள விஞ்ஞான பவனில் பிரதமர் நரேந்திர மோடி இன்று தொடங்கிவைத்தார்.

கொரோனா உள்ளிட்ட காரணங்களால் தள்ளிப்போன இந்த மாநாடு 6 ஆண்டு இடைவெளிக்கு பிறகு இன்று டெல்லியில் நடைபெற்று வருகிறது.  சுப்ரீம் கோர்ட்டு தலைமை நீதிபதி, மத்திய சட்ட மந்திரி ஆகியோர் முன்னிலையில் பிரதமர் மோடி இந்த மாநாட்டை தொடங்கி வைத்து உரையாற்றினார். அப்போது நீதிமன்றங்களில் உள்ளூர் மொழிகளை ஊக்குவிக்க வேண்டும் என்றும் இது நாட்டின் சாமானிய குடிமக்களுக்கு நீதித்துறை மீது நம்பிக்கையை அதிகரிக்கும் என்றும் பிரதமர் நரேந்திர மோடி தெரிவித்தார்.

அவரைத்தொடர்ந்து பேசிய தலைமை நீதிபதி என்.வி.ரமணா, “பொது நல வழக்குகளின் (பிஐஎல்) பின்னால் உள்ள நல்ல நோக்கங்கள் தவறாகப் பயன்படுத்தப்படுகின்றன. ஏனெனில் இது ‘தனிப்பட்ட நலன் வழக்குகளாக’ மாற்றப்பட்டு, திட்டங்களைத் தடுத்து, பொது அதிகாரிகளைப் பயமுறுத்துகிறது. அரசியல் மற்றும் கார்ப்பரேட் போட்டியாளர்களுடன் மதிப்பெண்களை தீர்க்கும் கருவியாக இது மாறியுள்ளது.

பெண் நீதிபதிகள் நீண்ட நேரம் நீதிமன்றங்களில் அமர பயப்படக்கூடிய நிலைமைதான் தற்போது இருக்கிறது. நீதிமன்றங்களை அதிக அளவில் அணுகக்கூடியது அரசாங்கங்கள்தான்.

சம்பந்தப்பட்ட மக்களின் தேவைகள் மற்றும் கோரிக்கைகளை உள்ளடக்கிய முழுமையான விவாதங்களுக்குப் பிறகு சட்டம் உருவாக்கப்பட வேண்டும். நிர்வாகிகள் செயல்படாதது மற்றும் சட்டமியற்றும் சபைகளின் செயலற்ற தன்மை காரணமாக அடிக்கடி வழக்குகள் தவிர்க்கப்படக் கூடியவையாக உள்ளன.

நகராட்சிகள், கிராம பஞ்சாயத்துகள் முறையாக கடமையாற்றினால், போலீசார் முறையாக விசாரணை செய்தால், சட்ட விரோத காவலில் சித்திரவதைக்கு முடிவு கட்டினால், மக்கள் நீதிமன்றத்தை நாட வேண்டி அவசியமில்லை.

நாடு முழுவதும் 4 கோடி வழக்குகளின் விசாரணை நீதிமன்றங்களில் நிலுவையில் உள்ளது. 10 லட்சம் பேருக்கு வெறும் 20 நீதிபதிகள்தான் இருப்பதால் வழக்குகளை சமாளிக்க போதுமானதாக இல்லை. காவல் துறையும், பதிவுத்துறை என்று அரசின் ஒவ்வொரு துறையும் அதன் பணியை சட்டப்படி செய்திருந்தால் பல வழக்குகள் நீதிமன்றத்துக்கு வர வேண்டியதே இருந்திருக்காது” என்று அவர் கூறினார்